科目：鄉土語言說唱藝術
講者：周定邦
◎台灣說唱藝術工作室團長◎
課程大綱：
一、 踏話頭。
二、 台灣說唱的定義佮來源。
三、 台灣說唱的傳播者。
四、 說唱的社會功能。
五、 台灣說唱型態的演變。
六、 說唱的題材。
七、 說唱的曲牌—歌仔調簡介。
八、 說唱的唱詞—歌仔冊簡介。
九、 說唱的伴奏樂器。
十、 收集參考資料。
十一、 收話尾。
【講師簡介】周定邦，現任台灣說唱藝術工作室團長、台南市菅芒花台語文學會理事長、台灣海翁台語文教育協會常務監事、台南縣政府母語教育推動諮詢委員、教育部國小鄉土語言教師、台語文作家、《菅芒花詩刊》同仁、《台灣e文藝》同仁。曾任鄉城台語讀書會會長；台南社教館附屬府城台語文讀書會創會會長；教育部等「鄉土語言教師培訓班」講師；台南市社區大學台語學程講師；賴和教師台灣文學營講師；高雄市政府「台灣文化研習營」講座；台灣文史營駐營作家；《菅芒花台語文學》主編；真理大學《台灣文學評論》特約連絡人；南都電台「土地的聲嗽」節目策劃及主持人。
跟隨國寶級藝人吳天羅及朱丁順，學習台灣說唱及恆春民謠，常應邀至政府機關、民間企業團體演出，推廣台灣說唱藝術。
曾獲南瀛文學新人獎；南瀛文學創作獎；鹽分地帶文學創作獎；台南縣政府〈南瀛之歌〉歌詞甄選第一名；台南市歌徵選作詞入圍獎；中華民國社區廣播電台協會「91年廣播金音獎」－「本土文化節目主持人獎」入圍；高雄縣傳統戲劇優良劇本徵選優等獎；屏東縣第四屆全國恆春民謠比賽亞軍；2003年A-Khioh賞台語文創作獎；2000年全國鄉土語言競賽，閩南語口說藝術類社會組第三名；2001年台南市鄉土語言教材徵選特優獎。作品入選「台灣詩路」、南瀛作家作品集、《現代台語文學讀本》、《台語詩新人選》、台南市南台灣文學作家作品集、台南市金華社區「台語囡仔詩文學步道」、《台語詩六十首》、《愛情kám-á店》、《鴨咪仔》、金安出版社的《台語讀本(10)》、中華民國全國教師會中小教師教學研究會選編出版的《閩南語學生手冊(四)》；著作有：台語詩集《起厝兮工儂》、台語七字仔白話史詩《義戰噍吧哖》、台語詩集《斑芝花開》、台語七字仔《台灣風雲榜》、台南人劇團《女巫奏鳴曲—馬克白詩篇》劇本台譯(原著Shakespeare之《Macbeth》)、布袋戲劇本《噍吧哖風雲》、台南人劇團《終局》之劇本台譯(原著Samuel Beckett之《Endgame》)。
一、 踏話頭：
我來唸歌予恁聽，無卜抾錢免著驚，勸咱做人著端正，虎死留皮人留名；講甲當今的世界，鳥為食亡人為財，想真做人著海海，死從何去生何來。
二、 台灣說唱的定義佮來源：
唐山過台灣，心肝結kui丸。
三、 台灣說唱的傳播者：
1.
賣藝的乞食。
乞食調：有量啊頭家啊，淡薄來分哩，予恁生囝啊生囝佮生孫啊。
2.
走唱者。
3.
江湖賣藥仔的藝人。
4.
茶店、酒家的賣唱(走唱)藝人。
5.
廣播電台的說唱藝人。
6.
歌仔先。
四、 說唱的社會功能：
五、 台灣說唱型態的演變：
1.
早期的唸歌(傳統式的唸歌)：以呂柳仙、吳天羅做例。
2.
改良式的唸歌：以楊秀卿做例。
六、 說唱的題材：
1.
台灣歷史故事佮民間傳說、社會事件。
2.
中國歷史故事佮民間傳說。
3.
勸世教化。
4.
事物歌。
5.
敘情相褒歌。
6.
禮俗事物佮趣味歌。
七、 說唱的曲牌—歌仔調簡介：
台灣說唱著是「唸歌」，「唸歌」所用的唱調民間叫做「歌仔調」。
1.
以呂柳仙的「青竹絲奇案」為例(傳統式說唱)：江湖調佮雜唸仔等/周定邦整理(節錄)
唱出王常一歌詩，蹛佇葡萄巷仔kinn1咧徛起，娶到(chu2kau3)姓蕭人囝兒，怹(in1)某蕭卻倌親名字；十七八歲來嫁伊，家內散(san2)li0來所致，頂來無兄下無弟，想著慘著死。清早起來天光時，王仔常一時有主意，我叫我賢妻來喔來參議，我卜外邦做生理，袂知賢妻乜主意？蕭卻倌聽一下見，開言就講起，我叫an2丈夫仔喂，卜做生理做汝去，家內是我的代誌，世事我發落，代誌我料理，勸君家事免khua3意。清早起來天光時，王仔常一時有主意，uainnh4 uainnh4行uainnh4 uainnh4去，來到西街(sai1kue1)市，順紲辦藥材買藥味，買甲十擔滇滇滇(tinn7)。我叫箍絡(khoo1loh8)兄叮嚀汝，藥材thin7藥味，共我擔落船仔去，毋通共我來延遲。人講箍絡兄有主意，藥材thin7藥味，擔落船未幾時，tai7公兄開船起行緊離ci3。船一下開，螺一下催，到矣，今(tann1)到外邦無幾時，稅店安身己，頭仔做交易(ka1iah8)加(ka1)利市，做一下久人ka2一下失志，定著歹運去，百五買入賣百四，十三本賣十二，十箍買入來，八箍共伊賣出去，年尾一下掠數，干干蝕本無趁錢。即條講了未完畢，後條再講起，聽我唱，唱到溪仔底一歌詩；一個姓吳吳文胎(the1)親名字，人叫吳舉人，舉人兄在大溪底咧徛起，萬貫家事富無比，怹厝偌好額偌有錢，開當店做生理；當店十三間，少年錢敢用，真敢hak4，hak4，kik4身穿，chai3玉環金手指，新新bin5鞋倒拖ti1，loo7bok8khun5che1四尺二，胸前khi2thok4pai5四五支，掛佇奚胸前tin7tong7hinn3，即爿hinn3過來，迄爿hinn3過去。清早起來天光時，吳舉人一時有主意，今仔日五月初五的日子，來去港仔墘看龍船看景緻，uainnh4 uainnh4行uainnh4 uainnh4去；來到葡萄巷仔kinn1，看著一個查某囡仔inn1，十七八歲的年紀，頭殼chih4 chih4 chih4，坐蹛門頭繡針黹(ciam1ci2)；生做偌嫷(sui2)偌標緻，tai7魚喙，蔥管鼻，柳葉眉，石榴齒，喙唇紅紅點胭脂，喙phue2邊一粒ba5bu7痣，頭毛參像kong3緞絲，阮厝大某毋值伊，較嫷阮細姨，予我看一下見，跤手ciau5麻痺，喙瀾tap8 tap8滴，hainn5hioo3魂魄險險綴伊去。擱再行擱再去，來到巷仔邊，tng7著一個賣花婆，手共iat8喙gi7gi7，阿婆仔來咧我問汝，一位娘囝生標緻，未知乜家人人氏，汝捌伊無？賣花婆聽一下見，笑笑才講起，怹翁王常字金俊，伊叫蕭春梅外號蕭卻倌親名字，怹翁王仔常偌古意，外邦做生理，連去歸半年，無寄批信轉來予伊，tng7著我投，投甲目澹佮目滴，汝今問我啥代誌？吳舉人腰肚te3插落去，jim5寡龍仔銀四千四，四千四錢白記記，阿婆仔喂我今拜託汝bi7是，遮e先予汝糴(tiah8)米，汝今趕緊共通知，怹翁出外tang1tang1去，我卜佮伊鬥伙計，講甲伊歡喜，前謝送十二，後謝無講起，未知婆仔乜主意？賣花婆e聽一下見，笑微微，就叫舉人兄，卜挃姻緣綴我行，包汝好勢毋免驚。吳舉人聽一下見，佮伊鬥陣去，uainnh4 uainnh4行行到葡萄巷仔kinn1，大廳內鑽入去，蕭卻倌笑笑來接伊，就請坐交椅安身己，汝赫爾(hiah4ni7)罕行到底卜創啥代誌？賣花婆笑笑才講起，我共汝紹介，汝佮伊無熟似，這個蹛佇溪底咧徛起，姓吳吳文胎，人叫舉人兄親名字，怹厝真爻做生理，當店十三間，出來佚陶看景緻，對遮過看汝嫷真合意，探聽知恁翁出外去，伊卜來共汝khuan2柴米，汝若予伊來包飼，食是山珍海味，穿是綾纙紡絲，差kan2使婢，用銀無用錢，未知蕭卻倌「小姐」乜主意？蕭卻倌聽一下見，目澹佮目滴，就罵老阿婆汝即個老頭兒，老好死，老賤人老賤婢，阮丈夫出外去，a1ca1錢我毋挃，卜佮我君顧名譽(bing5i3)。賣花婆被罵大面紅記記，無話通應伊，見笑甲卜死，頭殼chih4 chih4 chih4。吳舉人聽一下見，才應伊，拄拄著拄拄是，恁翁王仔常親名字，在蹛外邦做生理，有趁錢家後有建置，娶大某hak4細姨，吩咐我轉鄉里，叫我轉來共汝通知，叫汝奚若卜跳著趁青。蕭卻倌聽一下見，目屎流目屎滴，就罵斬頭半路死，破屎連路旁屍，無想較早當初時，我thin7伊，翁仔某感情好情意。吳舉人極厲害，聽伊咧哭隨時知，手隨插lak袋仔內，五十兩theh8起來，對桌頂著排，對桌頂著chai7落，ta3！ta3！ta3！我五十兩先借汝糴米佮買菜，恁翁若轉來，無，錢才還我，利息我無愛，theh8去用無kan1礙。蕭卻倌看著龍仔銀金sih4 sih4，就叫舉人兄，我共汝講，汝若無嫌我khiap4si3，咱來約一日，等待到八月十二，阮迄個老阿公做san2忌，汝才來我的親事才從汝。吳舉人聽一下見，大歡喜，笑笑講國語，「好(haunn5)」著是「好」，「好」著是好，好著是「好」，喙講「好」那thim3頭，八月十二定規到，來恁兜，食下晝。………
2.
以吳天羅的「台灣人民生活史」為例(傳統式說唱)：江湖調/周定邦整理(節錄)。
列位先生我總請，姓吳號做天羅我的名，我講的話攏嘛全有影，請恁靜靜e斟酌來聽。先請前輩老仔伯，二請各位少年家，來聽台灣的經過，全都是事實的問題。來講台灣的故事，全部事實毋是虛，歸cam3來聽誠趣味，袂輸予汝看戲看歸棚。台灣是咱的寶島，原早平洋全草埔，出入全部行小路，路邊全都是菅草林投喔。講起台灣較早大擾亂，島內全一寡紅毛番，迄cam3拄a荷蘭來咧管，鄭成功才來扑台灣。趕走荷蘭著是鄭成功，保持即個大明國不亡，廈門海面浮銅kong3，直接著來扑死清朝王。鄭成功才來離開福建省，堅持卜反清再擱復明，來到台灣才安定，才來趕走荷蘭兵。自將荷蘭趕出去，換咱即個漢人咧安居，可恨滿清較無理，共咱割予日本仔五十年。滿清割予日本管，日本仔才來起兵扑台灣，台灣同胞誠不滿，有的反抗的毋予伊過關。台灣的反抗的是誠濟，上濟著虎尾到西螺，日本兵來到西螺大溪底，戰死的若咧著人災(ce1)。日本到西螺大溪頂，挨挨陣陣幾偌千，用行的全部舉步銃，騎馬的揹刀做頭前。離遠共看袂清楚，歸條溪仔蟯蟯趖(ngiauh8ngiauh8so5)，探子走來佇咧報，騎馬的講全部揹長刀。西螺總理聽人喊(han2)，一個心肝誠袂安，伊著真緊張毋敢慢，著去招寡反抗義士班。西螺總理著傳命令，招人卜扑日本兵，清朝民間全有銃，好膽的人拚做前。日本仔來到西螺起造瘟，反抗義士戰去誠齊勻(ciau5un5)，戰甲暝日無歇睏，thai5死佇溪底歸大墩。日本仔起山的時代，西螺扑過虎尾擱閘咧thai5，土庫街內上損害，老勻的問看猶會知。土庫竹刺圍五里，圍到虎尾的庄邊，日本仔火砲直到位，土庫火燒著歸暝。日本大隊安爾直直到，土庫反抗的講總卜剿，查某的驚甲開聲哭，看查甫的thai5甲血那流。…………
3.
以楊秀卿的「勸世歌」為例(改良式說唱)：七字仔調、都馬調、江湖調等/周定邦整理。
【七字仔調】
即款的歌真稀罕，勸人做好在世間，有的真爻ue5頇慢，俗語塊講為人難。世界情理著淺淺，幾年中間著變遷，咱若改惡來從善，一日無事小神仙。講甲當今的世界，鳥為食亡人為財，想真做人著海海，死從何去生何來。
【都馬調】
阮來出世無半項，轉去雙手又空空，人佇世間像眠夢，死了江山讓別人。有的出世有家伙，兄弟無量起冤家，蹛佇世間若人客，死了江山別人的。做人毋通傷phinn7-mi7，人佇世間無幾年，人若卜死目ce7 nih4，萬事佮人勿相爭。心肝一人想一款，海來上深天上峘，艱苦富貴免哀怨，莫非著是前世冤。世情是我看上透，奸雄的人毋通交，勸恁少年cinn2 kang7老，偆錢是命免人爻。
【江湖調】
世間富戶塞塞滇，毋是人爻才偆錢，命歹看汝偌爻變，敢有爻人塞壁邊。百般是人的命運，毋是爻趁錢才偆，頇慢毋煞免食睏，有的趁著講(kang2)萬銀。即條情理共(kai)比並，艱苦富貴命生成，命歹看汝偌爻反，敢著萬世袂超(thiau)生。
4. 以楊秀卿的「胡蠅蠓仔大戰歌」做例(口白歌仔)，周定邦整理(節錄)。
卜唸即歌講真趣味，袂唸阮先共恁通知，講啥乜動物ia2 tio7有講起，閣也會冤家才有奇。萬物著是有性地，胡蠅蠓仔in嘛會起冤家，為著生活的關係，起甲一個問題跡大個。胡蠅卜去咬臭肉，飛來經(kenn)著蠓仔的跤，兩人冤家起相扑，為著生活起kau-ka。胡蠅靠伊大箍把，毋驚蠓仔伊一個，蠓仔想著真怨慼，起人卜佮汝冤家。胡蠅目珠展大蕊，毋驚蠓仔歕雞kui，無聽汝te2放狗屁，敢驚汝蠓仔黨人大堆。蠓仔毋願飛咧走，一睏飛轉到怹兜，去招蠓黨ciau5 ciau5到，卜掠胡蠅來捻(liam3)頭。胡蠅看著蠓仔到，趕緊雙手舞拳頭，扑倒蠓仔是安爾inn inn吼，順紲共掞落塗跤兜。蠓仔來扑輸誠冤枉，胡蠅汝的武藝跡靈通，趕緊來飛到竹管仔洞，卜請一尾sian7lang5仔王。蠓仔飛到竹管仔口，差人通報入內頭，為著冤仇才來拜候，共sian7lang5仔大哥說透流。sian7lang5仔聽著蠓仔講，胡蠅文武是雙項通，兩人相招行出竹管仔洞，卜來掠即隻胡蠅王。胡蠅看著sian7lang5仔來，驚甲強卜倒頭栽，知影sian7lang5仔喙厲害，飛懸毋敢歇落來。sian7lang5仔來看著伊胡蠅，兩蕊目珠看甲青凝凝(gin5)，胡蠅著驚飛緊緊，sian7lang5仔喙瀾喢喢tin。胡蠅愈想愈毋願，汝誠實卜結大冤，我絕對起人佮汝亂，卜請迄號法度比汝閣卡懸。胡蠅卜去請蜈蚣，卜請蜈蚣來破sian7lang5，伊滯厝頂角仔縫，一跡伊滯數十冬。蜈蚣聽著胡蠅咧講，講伊蠓仔做人不正宗，相招行出角仔洞，卜來收除即隻sian7lang5王。蜈蚣跤手特別濟，三十六肢一直爬，胡蠅看著毋su7勢，去問ka1cuah8伊一個。ka1cuah8滯佇菜廚仔府，人人稱伊是為軍師，伊的計智逐項有，兩枝消息閣佇身軀。ka1cuah8摧算無差chok4，即去一層三不hok8，緊對胡蠅來約束，蜈蚣即去會受勞碌。蠓仔看著蜈蚣來，趕緊報予sian7lang5仔知，sian7lang5仔想計佇心內，趕緊去請田蛤仔來。蛤仔滯佇田岸空，汝緊去請伊一人，若無伊來事歹紡，去請蛤仔破蜈蚣。蠓仔知影勢面bai2，趕緊去請田蛤仔來，蜈蚣法度我了解，我干那放尿伊著毋敢來。蠓仔去請伊田蛤仔，收除蜈蚣伊的跤，蜈蚣帶hong5卜來共咬，蛤仔放尿起na7chah4。蜈蚣去so5著蛤仔尿，疼著規身phok8phok8tio5，大聲細聲佇咧哀哀叫，跤骨親像火te2燒。蜈蚣即馬疼著規身phih8phih8chuah4，無跤今是卜安怎樣拖，一條親像手錶仔帶，遠遠看著嘛ka2若蛇。……
5. 以陳達、張新傳、張文傑、朱丁順等為例(恆春民謠)：思想起、五空小調、四季春、平埔調、牛尾拌。
恆春民謠紹介佮欣賞：
I.
思想起：
A、
陳達的「思想起」：台灣後來好所在。(雲門)
思想起，祖先堅心過台灣，也毋知台灣生做啥乜款。
思想起，海水蓋深著來反烏，佇海山塊浮漂(phioh4)汝心肝苦。
思想起，烏水卜過幾重心卡會清，拄著風颱塊絞大湧，有的咧瞻頭今來看天頂，ia2有的咧想安爾咧來問神明。
思想起，神明保佑祖先來，海底千萬毋通來做風颱，台灣後來好所在，經過三百年後齊齊知。
B、
張文傑的「思想起」：父母恩情。(阿猴-7)
思想起，第一蓋大著是天佮地，第二蓋大著是咱的老母thin7老父，毋信(sian3)咱大家來想詳細，骨頭是老父予咱，肉著是老母的。
II.
牛尾拌：
A、
朱丁順的「牛尾伴」。(阿猴-6)
紅柿好食是對tue2來起蒂，明仔後日毋通來忘恩佮背義。
妹君明仔後日卜去捧人的飯碗，汝著愛會曉來有孝汝的大家官。
III.
四季春：
A、
張新傳的「四季春」(阿猴-2)
列位貴賓請坐靜，小弟拜託幾分鐘，卜唱台灣舊史情，古早兩三百年前。
以前台灣是無人來開發，船隻入港用人拖，行船討海來船扑破，漂流台灣來求生活。
原早台灣是無人管，平洋曠土全生番，明末清初是天下亂，國姓才來開台灣。
B、
朱丁順的「四季春」(阿猴-5)
路邊草寮仔是阮的，無椅無桌不成家，內底設備是無好勢，恁若有對遮經過請恁入來坐。
囝汝著乖乖參阿姑仔滯，安爹堅心卜來出外，父囝卜來分開是無奈何，汝著毋好來刁阿姑仔講卜來揣我。
IV.
五空小調(五空仔)：
A、
張文傑的「五空小調」(楊榮失妻) (風潮-1)
正月算來桃花開，清倌病落繡房內，手舉清香下三界，下卜清倌好起來。
二月算來田草青，清倌失落在廳邊，忍心放我做汝去，放著細囝我晟持。
B、
朱丁順的「五空小調」(楊榮失妻) (風潮-2)
正月算來桃花開，清倌病落在房內，手舉清香下三界，下卜清倌好起來。
二月算來田草青，清倌失落在廳邊，夭壽賢妻歸陰去，放卜細囝啥卜晟持。
V.
平埔調：
A、
朱丁順的「平埔調」(風潮-5)
卜去台東趁銀票，袂知去到台東趁無著，想卜回轉驚人笑，姑不二衷予娘招。
卜去台東食粒飯，袂知去到台東大開荒，想卜回轉跡爾遠，想著故鄉心頭酸。
6.
以周定邦的《義戰噍吧哖(節錄)》為例：恆春民謠思想起、五空小調、平埔調等。
『掖種』
清芳阿猴來出世，本是散赤人囝兒，做人豪爽有義氣，交陪四海濟兄弟。
曾經加入義民軍，轉戰南部扑日本，永福閬港廈門遁，抗日火芛心頭滾。
一九一四甲寅年，清芳心內有看見，知影人民厭狗治，即股力量較大天。
迄時咧做外務員，抗日思想亦宣傳，心內暗暗想周全，卜反著愛全台灣。
台灣廟寺滿滿是，信徒攏是庄跤去，敬神拜佛足誠意，基層組織對遮起。
清芳心內有主意，只要chua7頭來起義，聯絡各地同齊起，台灣一定出頭天。
本是台南的參事，繼承父業人真富，予狗股票騙田厝，有志規氣扞廟務。
大潭區長鄭利記，不滿狗官無是非，同胞被欺袂得氣，辭職搬來台南市。
正月新年拄過去，清芳chua7頭著論起，西來庵內來密議，三人參詳卜起義。
安怎來拚才會贏，三大問題上頭疼，第一欠缺領導者，信徒內底揣形影。
第二欠缺是經費，起廟做醮募銀錢，第三欠缺是武器，募款唐山買銃枝。
為著囝孫的幸福，追求自由來抗暴，為卜建立台灣國，暫號大明慈悲國。
清芳開店做生理，福春米絞設廟邊，就近連絡好地理，抗日行動著開始。………
八、 說唱的唱詞—歌仔冊簡介：
舉例：褒歌嘛叫做「七字仔」、「閒仔歌」、「山歌」、「挽茶歌」、「飼牛歌」，是男女之間佇園裡、茶山調情所唱的歌謠，或者是無聊的時、飼牛的時、作穡的時、思春的時，所唱的歌詩。是上浪漫、上優美的民間歌謠，三百冬來佇台灣民間各所在咧流傳，表現男女之間愛情的各種面貌，有思春、單戀、初戀、熱戀、相觸、失戀、相思、綿爛、約會、相好、討契兄、偷食臊的情思。
【台東調】
人的阿哥咧開店，阮的阿哥咧賣鹽，一擺提錢一擺唸，鹽館的錢有較鹹。
福州鉸刀假有眼，無錢阿哥真寒酸，逐擺提錢逐擺限，限欲鐵樹開牡丹。
【南光調】
阮厝踮佇娘厝後，不時看娘咧探頭，情意總有九分九，路邊相搪頭勾勾。
門口一叢相思叢，相思病落毋知人，先生來看講無望，搭心來看好璫璫。
【狀元樓調】
玉蘭開花芳透天，挽入房間芳歸暝，將花提入蠓罩內，半暝芳到枕頭邊。
含笑扑莓大細蕊，鴨母落田雙跤開，我娘生緣免生嫷，八字有合拆袂開。
佮君約佇甘蔗溝，蔗尾扑結做號頭，夭壽啥人共阮敨，害阮一人淪一溝。
歌仔冊創作舉例：
阿榮揣頭路 周定邦寫/2001/05/17
列位朋友看遮來，歌仔是我來安排，念卜予恁聽看覓，若bai2請恁莫見怪。即陣景氣是真bai2，阿榮失業佇厝內，一日到暗揣東西，卜揣頭路趁錢財。阿榮今年四十五，頭家關店無頭路，一時失業變無步，可憐阿榮面烏烏。逐日報紙買規沓，內處寫甲花嗄嗄，電話舉來著共敲，揣無一間卜倩我。阿榮心頭亂紛紛，毋知做啥較靠穩，厝裡一群迹大群，揣無頭路怎食睏。一個機會得卜來，新聞報紙有記載，阿榮看著笑咳咳，準備應徵對遮來。阿榮來到才知影，卜倩工人兩三名，這是政府的官廳，卜倩工人搬物件。即搭叫做清潔隊，應徵的人規大堆，挨挨擠擠若看戲，阿榮看著面反青。為著厝裡的某囝，阿榮堅心佮in1拚，決心卜拚頭兩名，若無厝裡著吊鼎。即個考試真奇怪，考試官嘛誠慢來，chua7來一陣虎豹獅，講著佮in1比看覓。頭關比看啥爻走，猙狌綴佇尻川後，有人驚甲強卜吼，有人棄權緊回頭。阿榮想來擱想去，想著一個好計智，跤步慢慢來徙位，徙來落尾才著伊。阿榮頭關來通過，第二關是誠連回，雙手攬米兩大袋，去走五千才擱回。阿榮頭殼真正好，米袋共伊割兩刀，沿路走擱沿路遨，五千走煞米扑無。紲落來到第三關，即關佮人無仝款，阿榮看甲譑擱旋，若卜創治免迹全。即爿一個機器人，咧夯石碾頂下動，看伊咧夯誠輕鬆，無哼無哼面袂紅。擱來考官叫阿榮，來夯石碾通比並，時間拄好五分鐘，看啥體力較才情。阿榮假仙腹堵疼，卜去便所開砲城，偆的的人夯袂贏，阿榮尾等變頭名。阿榮頭路來揣好，逐日佇咧車糞埽，袂輸矸轢四界遨，身軀不時烏脞脞。即項頭路真艱苦，逐時身軀臭koonn1koonn1，透風落雨澹糊糊，月給總趁兩萬箍。阿榮想著好計智，暗時擱再排夜市，今是卜來賣啥乜，想來想去有主意。來來來緊來緊看，慢來著減看一半，列位朋友人客倌，盈暗好戲卜來搬。即碼卜賣虼蠽藥，毋通看伊像樹葉，咧毒虼蠽效果gioh8，無買包恁會礙虐。即項藥材是祖傳，名聲蓋倒全台灣，若佮虼蠽有結冤，包領一盒扑通關。即項藥方真正好，毋管虼蠽公或母，食了好食擱會討，毋信請汝看結果。即隻公的狗公腰，食了伊著起愛笑，擱會畏寒硞硞趒，想卜揣伴ann2乎燒。即碼母的予倚著，穢著病毒隨發燒，擱來兩隻著相招，chua7去舂壁挵大石。紲落卜來賣齒膏，即種齒膏別位無，用了喙齒較利刀，專門修理銅牙槽。擱來即項無臭彈，烏仁目鏡真好看，毋管天氣熱或寒，掛咧日頭隨落山。卜賣即項叫關刀，會當刣雞兼刣鵝，破柴切菜削楊桃，咧割重巡嘛真好。擱來即項菜瓜che3，專門幫助恁夫妻，若有想卜生後生，che3了定規生雙個。即個飯坩罕得看，轉過正爿出溫泉，轉過倒爿會洗碗，倒匼會當做算盤。即項神通袂輸仙，豬仔入去變煙腸，柴箍入去變牌匾，鐵枝入去變珮鍊。擱來即項人人愛，想卜好額擱發財，即支水觳買轉拜，一日三擺錢著來。擱來即項是雞kui1，選舉來用袂剋虧，歕落選票摕規堆，連鞭國會坐大位。若是想卜做總統，來買內褲上妥當，阮的內褲極好囊，頂峘標頭寫賊王。阿榮生做好喙水，趁錢袂輸咧khat4水，汝若有去踅夜市，加減交關袂剋虧。
九、 說唱的伴奏樂器：
說唱的伴奏樂器以月琴抑是大栱弦為主，有時亦用三弦、殼仔弦、二胡來伴奏，無仝的伴奏樂器有無仝的聲哨。
十、 收集參考資料：
1.
竹林書局：新竹市長安街16號；TEL：03-5222664；郵政劃撥：00080192號。
2.
台灣ㄟ店：【台北店】台北市新生南路三段76巷6號；TEL：02-23625799，02-23628835；FAX：02-23632864；郵政劃撥：00080192號。網址：http://www.taiouan.com.tw。
3.
風潮有聲出版(有)公司：台北縣新店市民權路130巷14號5F；TEL：02-22185881；FAX：02-22189484~5；網址：http://www.wind-records.com.tw。
4.
閩南語俗曲唱本「歌仔冊」全文資料庫。
5.
文建會、國立傳統藝術中心、各縣市文化局。
6.
其他台語網站。
十一、 收話尾。
沒有留言:
張貼留言